– “Шўртан” билан баҳс оғир ўтиши маълум эди. Про-Лигада осон ўйиннинг ўзи йўқ. Клуб мени олдинроқ бош мураббий сифатида эълон қилган бўлсада, кўрдингиз, айнан “Шўртан” билан учрашувдан олдин ПФЛ рўйхатидан ўтиб, мураббийлар ўриндиғидан ўрин олдим. Афсуски, ўтган турдаги “Сурхон”га қарши баҳсдан фарқли ўлароқ, бугун жамоага иштиёқ, хоҳиш ва жанговарлик камлик қилди. Шу боис очко йўқотдик. Машғулотларда йигитлар билан ишлаётган бўлсакда, афсуски, ўйин давомида жамоа берилаётган кўрсатмаларимнинг ярмини ҳам бажара олишмаяпти. Клубнинг мавсум олди селекция ишлари қандай олиб борилганлиги менга қоронғу, аммо бу ҳам натижамизга таъсир қилмоқда. Футболчиларнинг айни дамдаги ўйинидан ҳам, ҳаракатидан ҳам, ҳолатидан ҳам қониқаётганим йўқ”.

“Жамоага келганимда раҳбариятига Суперлигага олиб чиқишни ваъда бермаган бўлсамда, “Динамо”га қўлимдан келганча имконқадар ёрдам беришимни айтганман. Ҳозирда футболчилар руҳий босимда. Бундай пайтда фақатгина мураббийлар ва клуб эмас, мухлисларимиз ҳам жамоани қўллаб-қувватлашлари лозим. Акс ҳолда ўйин давомидаги кучли руҳий босим футболчиларга жиддий таъсир қилаяпти. Шундай экан, ҳали имконият бор экан, жамоани ҳозирги ҳолатидан олиб чиқишимиз учун барчамиз бирга якдил бўлиб ҳаракат қилишимиз шарт. Акс ҳолда вазиятдан чиқиб кетиш оғир бўлади. Шу боис мухлисларимиздан жамоани ҳар қандай ҳолатда ҳам қўллаб-қувватлашларини сўраб қолардим”.

“Рақиб жамоа “Шўртан” Про-Лигадаги ҳурматга сазовор жамоалардан бири. Улар сўнги сафар баҳсида “Андижон”ни мағлуб этишгани уларнинг кучига баҳодир. Бугун омад биз томонда бўлмади, акс ҳолда ғалаба қозонишимиз мумкин эди. Меҳмонлар ҳам ғалабани илиб кетиш учун имкониятига эга бўлишди. Иккинчи бўлимда ҳужумкор ўйин намойиш этиб, вазиятлардан фойдаланишимиз керак эди. Про-Лигада дам олишга вақт йўқ, яна 4 кундан кейин “Орол” билан баҳсга тайёргарлик кўриб, ижобий натижа қайд этишга интиламиз” – деди “Динамо” бош мураббийи Даврон Файзиев.

Усмон Ибодов ёзиб олди.

Манба : fcdinamo.uz