“Динамо” (Самарқанд) билан ўтказилган синов-назорат учрашувидан сўнг (1:1), “Шўртан” жамоаси тайёргарлик жараёнларининг иккинчи босқичини якунлади. Футболчиларга икки кунлик дам берилди. Машғулотлар 21 февралдан эътиборан яна “Оқ бўрилар”жамоасининг Ғузордаги қароргоҳида давом эттирилади.

Учрашувдан сўнг жамоа бош мураббийи Асрор Алиқулов қисқача қуйидаги фикрларини билдириб ўтди:

– Бугун қишки ўқув-йиғин машғулотлари давомидаги дастлабки жиддий синов назорат учрашувини ўтказдик. Қорли об-ҳаво бироз ўйин боришига ўз таъсирини билдирди, аммо биз учун фойдали бўлди. Чунки “Динамо” кучли жамоалар сирасига киради ва қолаверса, самарқандликлар олдига жиддий мақсад қўйилган. Иккинчидан тайёргарлик жараёнини бошлаганимиздан буён асосий эътиборимизни футболчиларни саралаб олишга ва уларнинг жисмоний ҳолатига қаратган эдик. Бугун мураббийлар гуруҳи билан биргаликда таркибга номзод бўлганларни кўрдик, уларнинг ҳаракатларидан хулоса чиқардик.

Ички имкониятларимиздан келиб чиқиб, машғулотларни ҳозирча, яна Ғузордаги ўз қароргоҳимизда давом эттириб турамиз.

Режа бўйича, 22 февраль куни футболчилар ҳамда мураббийлар гуруҳи Қарши шаҳрида тиббий кўрикдан ўтишади.

Навбатдаги ўртоқлик учрашувлари доирасида эса Суперлига вакили “Машъал” билан баҳс олиб боришни режалаштирганмиз. Шу кунларда ўйин ўтадиган сана бўйича келишиб олсак бўлди. Муборакликлар билан  23 февраль ёки 24 февраль куни сафарда учрашамиз.

 

“Шўртан” матбуот хизмати бўлими