Шу кунга қадар клуб бош директори лавозимида ишлаб келаётган Камолиддин Раҳимов “Шўртан” Профессионал Футбол Клуби  МЧЖ бош ҳомийси ва асосий таъсисчи ҳисобланган “Шўртаннефтгаз” МЧЖ раҳбариятининг буйруғига кўра, эгаллаб турган вазифасидан озод этилди. Унинг ўрнига “Шўртан” футбол клубининг бош директори этиб жамоада кўп йиллардан бери фаолият юритиб келаётган ва ҳозирги кунда клубнинг спорт ишлари бўйича директори лавозимида ишлаб келаётган Виктор Георгиевич Алешников тайинланди.

Бутун ҳаётини футболга бағишлаган В.Г.Алешников, дастлабки иш фаолиятини Сурхондарё вилояти Жарқўрғон туманидаги БЎСМда бошлаган. 1977 йилда Республика “Пахтакор” жамияти Марказий Кенгаши томонидан “Энг яхши мураббий” деб топилган. 1978 йилдан эса ҳакамлик соҳасини ҳам бошлаган. Республика тоифасидаги ҳакам сифатида Ўзбекистон Чемпионати, Кубоги баҳслари ҳамда собиқ Иттифоқ Чемпионати учрашувларини бошқарган.

Профессионал мураббий сифатидаги иш фаолиятини 1994 йили Сурхондарёнинг “Шўрчи” жамоасида бош мураббийликдан бошлаган. 2000 йиллардан эътиборан эса ўз тақдирини бевосита “Шўртан” жамоаси билан боғлади. Ғузорда кўп йиллар бош мураббийликдан токи, мураббий, футбол мактаби директорлиги, клубда аввал техник директор, кейин эса спорт ишлари бўйича директор лавозимларида фидокоран меҳнат қилиб келди. Ўтган йиллар давомида Виктор Алешников жонкуяр устоз сифатида жуда кўплаб шогирдларни тарбиялаб, камолга етказди. Бугунги кунда унинг шогирдлари жамиятимизнинг турли соҳаларида фаол меҳнат қилиб, Ватанимиз равнақи учун ўз билим ва кўникмаларини қўшиб келишмоқда. Улардан баъзилар эса футболда, жумладан Эркин Мирзаев “Шўртан” клубининг ўзида самарали меҳнат қилишмоқда.

Янги иш ва масъулиятли лавозимда тажрибали мутахассис Виктор Алешниковга клуби ходимлари ва барча мухлислари номидан муваффақиятлар тилаб қоламиз. Унинг раҳбарлигида “Шўртан” мамлакатимиз футболидаги ўз мавқеи, ўрни ва обрўсини яна тиклаб олишига ишонамиз.

“Шўртан” ПФК матбуот хизмати